Mátkedieđut

Boreal fievrridanfitnodagas leat njuolggadusat maid váhnemat fertejit dovdat ovdal mátkki. Loga eanet maid galggat bargat go vuollel 12 jahkásaš mánát mátkkoštit okto.

Bussefitnodat ii leat geatnegahtton fállát mánástuolu busses. Jos háliidat diehtit lea go busses mánáidstuollu, váldde oktavuođa minguin e-poastta bokte: post@snelandia.no

Árvvoštala váldit mielde iežat mánástuolu mii mánnái lea heivehuvvon.

Busse/Fleks: Jos mátkkošteddjiin ii leat allergiijadávda dahje eará dilálašvuođat mat dahket ahte elliid ii sáhte váldit bussii mielde, de lea ortnegis. Vuoddji ii leat gal geatnegahtton váldit elliid mielde earret jos dat lea oahpistanbeana dahje politiijabeana. Vuoddji sáhttá gáibidit ealli luoitit olggos jos dat givssida eará mátkkošteddjiid.

Leaktofatnasat/fearjjat: Báikkálaš- ja leaktofatnasis galget eallit biddjot ritta sisa mearriduvvon sadjái. Eai oaččo leat doppe gos mátkkošteaddjit leat, go ferte vuhtiiváldit eará mátkkošteddjiid (allergiija jna.). Fanasveahka mearrida goas ja man galle ealli heive váldit mielde. Sihkkarvuođa ákkaid geažil it sáhte rehkenastit ahte beasat leat elliin ovttas go mátkkoštat fatnasiin.

Jos háliidat fievrridit páhkaid dahje eará gálvvuid ruvttobusse dahje fatnasa mielde, de fertet váldit oktavuođa busse- dahje fanasfitnodagain guhte doaimmaha sáhtu. Dakkár bálvalus ii gula Snelandia (Finnmárkku fylkkagieldda) ovddasvástádussii. 

Gávdnan dihte gii doaimmaha ruvtto, oza ruvtto mátkeplánareaiddus dahje appas Snelandia Mátki. Vállje mátkki ja deaddil “čájet ruktodieđuid” , de gávnnat gii lea fievrrdideaddji. 

• Boreal Buss ja Boreal Båt oktavuođadieđuid gávnnat dáppe.
• Tide Buss AS: Sádde e-poastta gods.finnmark@tide.no

Jos busse maŋŋona eanet go 20 minuhta, de lea dus vuoigatvuohta ee. oažžut buhtaduvvot eará sáhtu, jos maŋŋoneapmi ii leat ovddalgihtii almmuhuvvon dahje fitnodat ii leat sivalaš maŋŋoneapmái (omd. dálke- ja vuodjindilálašvuođat).   

Loga eanet mátkedáhkádusa eavttuid ja geavaheami birra.

Min fievrrededdjiin leat ođđaáigásaš, oadjebas ja vuogas busset. Min bussiin ja fatnasiin leat dábálaččat:

• Stuolut maid sáhttá heivehit ja dorvoboagán
• Rabas áibmofierbmi (Wi-Fi) bussiin (dábálaččat ii Fleks-sáhtuin)
• Hivsset bussiin ja fatnasiin guhkes mátkkiin
• Fearjjain ja leaktofatnasiin fidne oastit ovttageardán borramuša (dábálaččat káfe jna.)

Busseruvttot eai leat heivehuvvon girdiruvttuide. Sii guđet mátkkoštit Girkonjárgga girdišilljui dahje girdišilljus sáhttet lohkat čileghusa dás (dárogillii).

Snelandia vástida fievrridanbálvalusa muhtun girdišiljuide, dábáleamos daid áiggiid goas girdit bohtet ja vulget. Girdit eai dábálaččat vuordde mátkkošteddjiid jos Snelandia fievru maŋŋona, ja mii eatge sáhte vuordit maŋŋonan girddi. Mii fertet vuhtiiváldit vuoddji bargoáiggi ja eará mátkkošteddjiid dárbbuid. Seammá gusto go mátkkoštat olggos fylkkas Svipper ruvttuiguin. 

Snelandia mielas lea dehálaš ahte sáhttofálaldat lea buohkaide heivehuvvon, mii mearkkaša ahte buohkain galgá seamma vejolašvuohta mátkkoštit, beroškeahttá doaibmavádjitvuođas dahje eará lihkadanváttuin. Almmatge lea muhtumin dárbu heivehuvvon fievrredeapmái, ja dalle livčče buorre jos dan almmuha ovddalgihtii. Buotlágan hástalusaid lea dábálaččat vejolaš čoavdit.

Bussevuoddji veahkeha buohkaid bisánansajis, leaččat dal čalmmeheapme/heajos oaidnu, čohkkát juvlastuolus dahje eará sivaid geažil dárbbašat veahki.

Jos fearggain áiggut johtit, de lea dehálaš ovddalgihtii dieđihit feargabargiide jos dus leat erenoamáš dárbbut. Muhtun fearggain lea sierra biilaguođđinsadji lahka heaissa, ja jos dan fertet geavahit, de atte dieđu ovddalgihtii, ovdamearkka dihte telefovnna bokte njuolgga fergii. Gávnnat oktavuođadieđuid fearggaide min neahttasiiddus. 

Buot min leaktofatnasat leat buohkaide heivehuvvon, ja seammá go fearggas de livčče buorre jos ovddalgihtii dieđihat jos dus leat erenoamáš dárbbut.