Skuvlasáhttoohcamis ferte almmuhit manlágan fievrru oahppi dárbbaša. Sáhttá válljet juo go busse, fatnasa, drošše dahje iežas fievrru. Jos oahppái juolluduvvo nuvttá skuvlasáhttu, de almmuhuvvo reivves manlágan fievrru oahppi galgá geavahit. Ohppiide, geat sáhttet geavahit almmolaš sáhttofálaldaga, ii juolluduvvo nuvttá skuvlasáhtu droššiin dahje iežas fievrruin. Loga eanet iešguđet sáhttofálaldagaid birra dás vuollelis.
Oahppit galget geavahit almmolaš sáhttofálaldaga ruovttu ja skuvlla gaskka jos dat soahpá dábálaš skuvlaálgin- ja nohkanáigái, ja jos mátkkoštanáigi lea dohkálaš. Almmolaš sáhttofálaldahkii gullet Snelandia busse- ja fanassáhtut.
Geahča Snelandia mátkeplánareaiddu
Taxi busse sadjái
Oahppit sáhttet oažžut “Taxi busse sadjái” doppe gos almmolaš sáhttofálaldat ii dohkke. Dat mearkkaša ahte taxi viežžá oahppi/ohppiid dihto deaivvadanbáikkis šiehtaduvvon áigái. Dárkileappo dieđut bohtet ovdan nuvttá skuvlasáhtu mearrádusas.
Iežas fievru sáhttá ohcama bokte juolluduvvot skuvlasáhttun, jos oahppis leat erenoamáš dárbbut dahje jos almmolaš sáhttofálaldat ii leat sajis. Oahppi gii erenoamáš dárbbuid geažil dárbbaša iežas fievrru skuvlasáhttun galgá čájehit duođaštusa doavttiris ahte son ii sáhte geavahit almmolaš sáhttofálaldaga.
Iežas fievrru geavaheapmi mearkkaša ahte oahppái dahje ovddasteaddjái mieđihuvvo máksu fievrru vuodjima ovddas.
Buhtadusmáksu iežas fievrru vuodjimis:
- 5 kruvnnu juohke kilomehteris.
- Bummaruđat, fearjabileahtat jna.
Lobi geavahit iežas fievrru skuvlasáhttun ozat seamma láhkai go skuvlasáhtu muđui. Rávisolbmot geat leat oahppit vuođđoskuvllas galget russet «Egenskyss»/«Iežas sáhttu» dieđihanskovis maid sii de addet skuvlii.
Máksu
Go ohcamuš geavahit iežas fievrru skuvlasáhttun lea dohkkehuvvon, de galgá sáddejuvvot vuodjinrehket skuvlii juohke mánus. Skuvla doaimmaha vuodjinrehkega viidáseappot fylkkagildii mii fuolaha máksámušaid.
Skuvla galgá dárkkistit ahte oahppi lea leamaš skuvllas daid beivviid son lea bivdán mávssu vuodjima ovddas.
Vuodjinrehketskovvi
Go válddát oktavuođa fylkkagielddain váilevaš dahje máŋŋonan mávssu hárrái, de bivdit ahte dieđihat referánsanummira mii čuožžu máksoduođaštusas maid leat ožžon e-poastta bokte go sáddejit vuodjinrehketskovi. Oaččut mávssu sullii 20 beaivve maŋŋá go fylkkagielda lea vuostáiváldán dan.
Bussefálaldat - guđe busse sáhttá oahppi geavahit?
Sáhttoduođaštus gusto buot Snelandia busseruvttuide gaskkal oahppi ássanbáikki ja skuvlla, maiddái jos lea dárbu lonuhit fievrru gaskan. Sáhttokoartta beassá geavahit buot bussiin ja diŋgonsáhtuin/Fleks . Busse galgá váldit mielde ohppiid fásta bisánansajiin, nu guhkás go vejolaš.
Sáhttokoarta ii gusto eahkedis, bassebeivviid, luomus dahje eará friddjabeivviin. Dalle ferte oastit dábálaš bileahta.
Snelandia mátkeplánareaiddus dahje snelandia.no:s leat eanet dieđut mátkkoštanmolssaeavttuid ja sáhttofálaldaga birra.
Oahppit geain leat oaivilat dahje háliidit váidit vuogi movt skuvlasáhttu organiserejuvvo almmolaš fievrruiguin, galget váldit oktavuođa skuvllain, vai skuvla beassá ášši fievrridit viidáseappot fylkkagildii.
Ruvttorievdadusat ja mátkedáhkádus
Fievrrideaddji galgá nu johtilit go vejolaš dieđihit jos sáhttofálaldat maŋŋona dahje bissehuvvo. Buot maŋŋoneamit guhkit go 15 minuhta dahje bisseheamit galget almmuhuvvot snelandia.no neahttabáikkis dahje ruktobálvalusas 177. Eará sáhttofálaldat galgá lágiduvvot jos dat geavatlaččat lea vejolaš.
Mátkedáhkádus gusto buot bussemátkkiide Finnmárkkus, jos vuorddekeahtes rievdadus ii leat ovddalgihtii dieđihuvvon, ja jos eará sáhtu ii fállojuvvo dahje jos fievrrideaddji lea sivalaš maŋŋoneapmái dahje bisseheapmái. Mátkedáhkádus ii gusto fanasmátkkiide.
Mátkedáhkádusgáibádus galgá sáddejuvvot guoskevaš fievrridanfitnodahkii.
Loga eanet mátkedáhkádusa birra
Oahppit sáhttet erenoamáš dárbbuid ja váilevaš almmolaš sáhttofálaldaga geažil oažžut juolluduvvot drošše skuvlasáhttun. Oažžut drošše skuvlasáhttun erenoamáš dárbbuid geažil gáibida dearvvašvuođaduođaštusa ahte ii sáhte geavahit almmolaš sáhttofálaldaga.
Oahppit geain leat erenoamáš dárbbut dahje jos sáhttofálaldat váilu, galget ohcanskovis válljet drošše skuvlasáhttun. Ohcanskovvi sáddejuvvo oahppi skuvlii.
Sámegillii ođasmahttojuvvon 12.12.2025
Samisk versjon oppdatert 12.12.2025